मंत्री उदय सामंत यांची प्रमुख उपस्थिती; गायिका शमिमा अख्तर यांचे अभंगगायन आणि ‘डिस्कव्हरी’च्या वारीवरील विशेष माहितीपटाचे होणार प्रदर्शन
नवी दिल्ली (वर्तमान महाराष्ट्र वृत्तसेवा):
आषाढी एकादशीच्या पावन पर्वावर देशाची राजधानी नवी दिल्लीतील महाराष्ट्र सदनात विठूभक्तीचा अनोखा सोहळा रंगणार आहे. महाराष्ट्र सदन, ‘सरहद’ (पुणे) आणि ‘महाराष्ट्र परिचय केंद्र’ (नवी दिल्ली) यांच्या संयुक्त विद्यमाने २३ जुलै रोजी सायंकाळी ६ वाजता ‘माझे माहेर पंढरी’ या विशेष भक्तीसंध्या कार्यक्रमाचे भव्य आयोजन करण्यात आले आहे.
दिल्लीतील नागरिकांना आणि विठ्ठलभक्तांना या सोहळ्याच्या माध्यमातून विठूभक्तीच्या रसात भिजण्याची अनोखी पर्वणी मिळणार आहे.
उद्योगमंत्री उदय सामंत यांची मुख्य उपस्थिती
महाराष्ट्र सदनाच्या सभागृहात पार पडणाऱ्या या सोहळ्याला महाराष्ट्राचे उद्योग व मराठी भाषा मंत्री उदय सामंत हे मुख्य अतिथी म्हणून उपस्थित राहणार आहेत. त्यांच्यासोबतच विविध क्षेत्रांतील इतरही मान्यवर या कार्यक्रमाला उपस्थित राहतील.
या भक्तीसंध्येत प्रसिद्ध गायिका शमिमा अख्तर आपल्या सुरेल आवाजात संतश्रेष्ठांचे विविध मराठी अभंग सादर करून उपस्थितांना भावमुग्ध करतील.
‘डिस्कव्हरी’च्या विशेष माहितीपटाचे स्क्रीनिंग
महाराष्ट्राची वैशिष्ट्यपूर्ण वारकरी परंपरा आणि तिचे जागतिक स्तरावरील महत्त्व अधोरेखित करण्यासाठी माहिती व जनसंपर्क महासंचालनालयाने ‘वॉर्नर ब्रदर्स डिस्कव्हरी’ वाहिनीच्या सहकार्याने विशेष माहितीपट तयार केला आहे. ‘Pandharpur Wari : In The Footsteps of Saints’ (पंढरपूर वारी : संतांच्या पाऊलखुणा) या विशेष माहितीपटाचे स्क्रीनिंग या कार्यक्रमादरम्यान केले जाणार आहे.
महाराष्ट्राची ऐतिहासिक संतपरंपरा आणि समानतेची शिकवण दाखवणारा हा माहितीपट मराठी आणि इंग्रजीसह हिंदी, तमिळ, तेलगू, बंगाली, कन्नड, मल्याळम अशा ९ विविध भाषांमध्ये डब करण्यात आला आहे. ‘डिस्कव्हरी’, ‘टीएलसी’, ‘अॅनिमल प्लॅनेट’, ‘डिस्कव्हरी सायन्स’ यांसारख्या ९ प्रमुख वाहिन्यांवरून संपूर्ण ‘सार्क’ (SAARC) देशांमध्ये या माहितीपटाचे प्रसारण केले जात आहे.
उपस्थित राहण्याचे आवाहन
महाराष्ट्र सदनात होणाऱ्या या मंगलमय सोहळ्याला नागरिकांनी मोठ्या संख्येने उपस्थित राहावे, असे आवाहन महाराष्ट्र शासनाच्या निवासी आयुक्त डॉ. श्वेता सिंघल, ‘सरहद’ संस्थेचे संस्थापक अध्यक्ष संजय नहार, महाराष्ट्र परिचय केंद्राचे संचालक हेमराज बागुल आणि ‘सरहद’चे समन्वयक लेशपाल जवळगे यांनी केले आहे.
