केज/बीड:
सर्वसामान्यांची वाहिनी आणि महाराष्ट्राची जीवनवाहिनी असलेल्या महाराष्ट्र राज्य रस्ते वाहतूक महामंडळाच्या (एसटी) बसचा आज १ जून २०२६ रोजी ७८ वा सेवा वर्धापन दिन (वाढदिवस) राज्यभरात मोठ्या उत्साहात साजरा केला जात आहे. याच पार्श्वभूमीवर, बीड जिल्ह्यातील धारूर आगाराच्या एका बसला आकर्षक पद्धतीने सजवून तिचा वाढदिवस साजरा करण्यात आला. ही बस केज बसस्थानकावर आली असता, तेथील प्रवासी आणि एसटी कमचाऱ्यांनी तिचे जल्लोषात स्वागत केले.
एसटी महामंडळाच्या प्रवासाला १ जून १९४८ रोजी पुणे ते अहमदनगर या पहिल्या बसफेरीने सुरुवात झाली होती. तेव्हापासून आजतागायत अविरत सेवा देणाऱ्या या ‘लालपरी’ बद्दल कृतज्ञता व्यक्त करण्यासाठी दरवर्षी १ जून हा दिवस एसटीचा वाढदिवस म्हणून साजरा केला जातो.
‘माझ्या लालपरीचा वाढदिवस’ संदेशाने वेधले लक्ष
धारूर आगाराच्या MH 14 BT 1927 या क्रमांकाच्या बसच्या समोरील काचेवर “वाढदिवस माझ्या लालपरीचा – १ जून, धारूर आगार” असा सुंदर संदेश लिहिण्यात आला होता. तसेच संपूर्ण बसवर पांढऱ्या आणि गुलाबी रंगाने आकर्षक नक्षीकाम करून, समोरच्या बाजूला फुलांचे गुच्छ आणि झेंडूच्या फुलांचा हार घालून बसला एखाद्या नववधूसारखे नटवण्यात आले होते.
कर्मचारी आणि प्रवाशांचा उत्साह
सकाळी ७:४७ च्या सुमारास ही सजलेली बस केज बसस्थानकात दाखल झाली. नेहमीप्रमाणे धावणाऱ्या धावपळीच्या बसेसपेक्षा वेगळ्या आणि अत्यंत देखण्या रूपात आलेल्या या बसने सर्वांचेच लक्ष वेधून घेतले. यावेळी स्थानकावर उपस्थित असलेल्या प्रवाशांनी, एसटी चालकांनी, वाहकांनी आणि सुरक्षा रक्षकांनी एकत्र येत बससमोर थांबून आनंदाने फोटो काढले. दुर्गम भागातील वाड्या-वस्त्यांपर्यंत पोहोचून प्रवाशांना सुरक्षित सेवा देणाऱ्या या लाडक्या लालपरीप्रती सर्वांच्याच चेहऱ्यावर एक वेगळाच आदर आणि आनंद ओसंडून वाहत होता.
धारूर आगाराने आपल्या बसचा वाढदिवस इतक्या आगळ्यावेगळ्या आणि जिव्हाळ्याच्या पद्धतीने साजरा केल्याबद्दल केज परिसरातील प्रवाशांकडून आणि वाहतूक वर्तुळातून त्यांचे विशेष कौतुक होत आहे.
