पुणे:
डॉ. बाबासाहेब आंबेडकर यांच्या जयंतीनिमित्त येवलेवाडी येथील साई द्वारिका मित्र परिवारातर्फे विविध सामाजिक, सांस्कृतिक आणि पर्यावरणपूरक उपक्रमांचे आयोजन करण्यात आले होते. जाधव परिवाराच्या प्रमुख उपस्थितीत पार पडलेल्या या कार्यक्रमांनी परिसरात मानवता आणि सामाजिक ऐक्याचा संदेश दिला.
मध्यरात्री फटाक्यांची आतषबाजी:
१३ एप्रिलच्या मध्यरात्री ठीक १२ वाजता भीमरायांच्या जयंतीचे स्वागत मोठ्या उत्साहात करण्यात आले. यावेळी झालेल्या भव्य फटाक्यांच्या आतषबाजीने परिसर दुमदुमून गेला होता.
पर्यावरण संवर्धनासाठी वृक्षारोपण:
१४ एप्रिल रोजी सकाळी ११ वाजता सोसायटीच्या मुख्य प्रवेशद्वाराजवळ वृक्षारोपणाचा कार्यक्रम झाला. रहिवाशांनी मोठ्या संख्येने एकत्र येत विविध रोपांची लागवड केली आणि केवळ झाडे लावून न थांबता त्यांचे संवर्धन करण्याचा सामूहिक संकल्प केला.
बुद्ध वंदना आणि महाप्रसाद:
वृक्षारोपणानंतर बुद्ध वंदना घेण्यात आली, ज्यामध्ये उपस्थितांनी एकत्रित प्रार्थना करून समता आणि बंधुभावाचा विचार जोपासण्याची शपथ घेतली. यानंतर आयोजित करण्यात आलेल्या भोजन दानाच्या उपक्रमातून मानवसेवेचा आदर्श समाजासमोर ठेवण्यात आला.
सामाजिक ऐक्याचा निर्धार:
“शिका, संघटित व्हा आणि संघर्ष करा” हा बाबासाहेबांचा विचार कृतीत उतरवण्यासाठी साई द्वारिका मित्र परिवाराने पुढाकार घेतला. भविष्यातही असेच विधायक आणि समाजाभिमुख उपक्रम राबवण्याचा निर्धार यावेळी व्यक्त करण्यात आला. या कार्यक्रमाचे यशस्वी आयोजन केल्याबद्दल परिसरातून कौतुक होत आहे.
वृत्त संकलन: विशाल सरवदे (पुणे जिल्हा प्रतिनिधी)
