बीड: वाढती लोकसंख्या आणि बाजारपेठांच्या विस्तारामुळे निर्माण झालेल्या प्लास्टिक कचऱ्याच्या समस्येवर मात करण्यासाठी बीड जिल्ह्यात ३० दिवसांची विशेष ‘एकल वापर प्लास्टिक बंदी’ (सिंगल युज प्लास्टिक) मोहीम राबवली जात आहे. या मोहिमेचे अधिकृत उद्घाटन पर्यावरण, वातावरणीय बदल तथा पशुसंवर्धन मंत्री पंकजाताई मुंडे यांच्या हस्ते करण्यात आले.
जिल्हाधिकारी विवेक जॉन्सन यांच्या मार्गदर्शनाखाली जिल्हाधिकारी कार्यालयातील सभागृहात या मोहिमेचा शुभारंभ झाला. यावेळी जिल्हाधिकारी विवेक जॉन्सन, जिल्हा परिषदेचे मुख्य कार्यकारी अधिकारी जितीन रहेमान, निवासी उपजिल्हाधिकारी सतिश सोनी यांच्यासह संबंधित यंत्रणेचे वरिष्ठ अधिकारी उपस्थित होते.
मोहिमेची व्याप्ती आणि अंमलबजावणी
बीड जिल्ह्यातील ६ नगरपरिषदा आणि ५ नगरपंचायती अशा एकूण ११ शहरी स्थानिक स्वराज्य संस्थांमध्ये ‘सिंगल युज प्लास्टिक मुक्त शहर’ ही संकल्पना राबवली जात आहे. जिल्हा प्रशासन अधिकारी जाधव यांनी दिलेल्या माहितीनुसार, या मोहिमेची अंमलबजावणी पुढील ३ टप्प्यांत केली जाणार आहे:
- टप्पा १ (१५ ते २५ जुलै): या कालावधीत व्यापक जनजागृती मोहीम राबवण्यात येईल.
- टप्पा २ (२६ जुलै ते ५ ऑगस्ट): व्यापारी प्रतिष्ठाने आणि बाजारपेठांमध्ये विशेष तपासणी व दंडात्मक कारवाई केली जाईल.
- टप्पा ३ (६ ते १५ ऑगस्ट): प्लास्टिकमुक्त शहर संकल्पनेअंतर्गत विविध विशेष उपक्रम राबवण्यात येणार आहेत.
जिल्हा प्रशासन अधिकारी संभाजी वाघमारे यांनी दिलेल्या माहितीनुसार, मोहिमेमध्ये कापडी व पर्यावरणपूरक पिशव्यांच्या वापराला प्रोत्साहन देणे, व्यापारी, शाळा, महाविद्यालये आणि स्वयंसेवी संस्थांना मोहिमेत जोडणे, प्लास्टिक संकलन करणे आणि नियम मोडणाऱ्यांवर दंडात्मक कारवाई करणे ही या मोहिमेची मुख्य वैशिष्ट्ये आहेत.
