जगदीप वनशिव, वर्तमान महाराष्ट्र वृत्तसेवा
नागपूर: येथील विद्यानगरी रेशीम बाग परिसरातील महात्मा फुले सभागृहात नुकताच एक शानदार साहित्य सोहळा पार पडला. महात्मा फुले शिक्षण संस्था आणि महिला विकास समिती, नागपूर यांच्या संयुक्त विद्यमाने आयोजित या कार्यक्रमात आदर्श शिक्षिका मंजुषा कऊटकर यांच्या ‘मन जेव्हा हिरवळले’ या कवितासंग्रहाचे दिमाखदार प्रकाशन करण्यात आले. आई सावित्रींच्या स्मृती प्रित्यर्थ आयोजित या सोहळ्याने नागपूरच्या साहित्य वर्तुळात चैतन्य निर्माण केले असून, साहित्यातील ताज्या मराठी बातम्या पोहोचवण्यासाठी ‘वर्तमान महाराष्ट्र’ सदैव तत्पर आहे.
या प्रकाशन सोहळ्याच्या अध्यक्षस्थानी महात्मा फुले शिक्षण संस्थेचे अध्यक्ष मा. प्रा. अरुण पवार होते. तर प्रमुख अतिथी म्हणून नागपूर महानगरपालिकेच्या उपायुक्त तथा परिवहन व्यवस्थापक डॉ. मेघना वासनकर-बगडे यांची उपस्थिती लाभली होती. याप्रसंगी बोलताना मान्यवरांनी मंजुषा कऊटकर यांच्या काव्यप्रतिभेचे कौतुक केले. विशेष म्हणजे, ‘मन जेव्हा हिरवळले’ या संग्रहास विख्यात हास्य कवी अशोक नायगावकर यांची अभ्यासपूर्ण प्रस्तावना लाभली असून, ज्येष्ठ कवी अशोक बागवे यांची पाठराखण आणि कविवर्य विठ्ठल वाघ यांचे आशीर्वाद लाभले आहेत, जे या कृतीचे साहित्यिक मूल्य अधोरेखित करतात.
याच सोहळ्यात कीर्ती लंगडे यांच्या ‘माय आणि माती’ या कवितासंग्रहाचेही प्रकाशन मान्यवरांच्या हस्ते करण्यात आले. कार्यक्रमाचे नेटके सूत्रसंचालन संस्थेच्या संचालिका व महिला विकास समितीच्या मा. शोभाताई लेकुरवाळे यांनी केले, तर मा. उज्वलाताई पाटील यांनी उपस्थितांचे आभार मानले. या प्रसंगी मा. पंकज कुरळकर, मा. अभिजीत पोतले यांच्यासह संस्थेचे अनेक मान्यवर सभासद आणि रसिक मोठ्या संख्येने उपस्थित होते.
