बनसारोळा, (प्रतिनिधी) : कृषी क्षेत्रातील उल्लेखनीय आणि मार्गदर्शक कार्याची दखल घेत महाराष्ट्र शासनाच्या कृषी विभागामार्फत दिला जाणारा सन २०२३ चा प्रतिष्ठेचा ‘जिजामाता कृषिभूषण पुरस्कार’ जाहीर झाल्याबद्दल बनसारोळा येथील प्रगतशील महिला शेतकरी मंगल बाळासाहेब काकडे यांचा बनसारोळा व परिसरातील नागरिकांच्या वतीने जाहीर नागरी सत्कार करण्यात आला.
या भव्य सत्कार सोहळ्याला विविध सामाजिक, शैक्षणिक व कृषी क्षेत्रातील मान्यवरांसह परिसरातील ग्रामस्थ आणि शेतकरी बांधव मोठ्या संख्येने उपस्थित होते. सत्कार समारंभात उपस्थित वक्त्यांनी मंगल काकडे यांच्या शेती क्षेत्रातील महत्त्वपूर्ण योगदानाचा गौरव करत त्यांच्या अद्वितीय कार्याचे कौतुक केले. आधुनिक शेती तंत्रज्ञानाचा कौशल्याने केलेला अवलंब, परिसरातील शेतकऱ्यांमध्ये केलेली सातत्यपूर्ण जनजागृती आणि कृषी विकासासाठी त्यांनी घेतलेले अविरत कष्ट यामुळेच त्यांना हा सर्वोच्च व मानाचा राज्यस्तरीय पुरस्कार प्राप्त झाल्याचे मान्यवरांनी आपल्या भाषणात सांगितले.
नागरी सत्काराला उत्तर देताना मंगल बाळासाहेब काकडे अत्यंत भावुक झाल्या होत्या. आपल्या भावना व्यक्त करताना त्या म्हणाल्या की, “शासनाने दिलेला हा अत्यंत मानाचा सन्मान केवळ माझा स्वतःचा नसून, माझ्या पाठीशी खंबीरपणे उभे राहणाऱ्या परिसरातील सर्व शेतकरी बांधवांचा आणि ग्रामस्थांचा आहे. या पुरस्कारामुळे माझी जबाबदारी आणखी वाढली असून, भविष्यातही शेती क्षेत्राच्या सर्वांगीण विकासासाठी आणि शेतकरी बांधवांच्या आर्थिक प्रगतीसाठी अधिक जोमाने कार्यरत राहण्याचा संकल्प मी करीत आहे.”
या आनंदोत्सवाच्या प्रसंगी अनिल जोगदंड, रशिकांत जोगदंड, गुणवंत धायगुडे, दत्ता काकडे, औरंगपूर गावचे माजी सरपंच सुधीर रानमारे, रमेश गोरेमाळी, बाळू गोरे, बिभीषण गोरे यांच्यासह अनेक प्रतिष्ठित नागरिक, तरुण आणि शेतकरी बांधव मोठ्या संख्येने उपस्थित होते. कार्यक्रमाला उपस्थित सर्वच नागरिकांनी मंगल काकडे यांना पुष्पगुच्छ देऊन व पेढे भरवून पुढील वाटचालीस भरभरून शुभेच्छा दिल्या. अत्यंत आनंदी, उत्साही आणि कौतुकास्पद वातावरणात हा सत्कार सोहळा संपन्न झाला.
