बनसारोळा धिवार राजकुमार
केज तालुक्यातील बनसारोळा येथे भारतीय जनता पार्टीच्या वतीने दुष्काळाच्या पार्श्वभूमीवर समाजातील गरीब, गरजू, निराधार व विधवा महिलांना दिवाळीचा शिधा वाटप करून सामाजिक बांधिलकी जपण्यात आली. केज विधानसभा मतदारसंघाच्या कर्तव्यदक्ष आमदार माननीय सौ. नमिताताई अक्षय मुंदडा यांच्या आदेशानुसार बाळासाहेब जाधव यांच्या पुढाकारातून हा स्तुत्य उपक्रम राबविण्यात आला.
सध्या दुष्काळी परिस्थितीमुळे अनेक गरीब व कष्टकरी कुटुंबांसमोर आर्थिक अडचणी निर्माण झाल्या आहेत. अशा परिस्थितीत निराधार व विधवा महिलांची दिवाळी गोड व्हावी, त्यांच्या चेहऱ्यावर आनंद फुलावा आणि सणासुदीच्या काळात त्यांना आधार मिळावा, या सामाजिक भावनेतून दिवाळीच्या शिध्याचे वाटप करण्यात आले.
या उपक्रमामुळे लाभार्थी महिलांमध्ये आनंदाचे वातावरण निर्माण झाले. संकटाच्या काळात गरजू महिलांच्या मदतीला धावून येत त्यांची दिवाळी आनंदात साजरी व्हावी, यासाठी करण्यात आलेल्या या उपक्रमाचे गावातून सर्वत्र कौतुक होत आहे.
या शिधावाटप कार्यक्रमास उपसरपंच बापूसाहेब कावळे, ग्रामपंचायत सदस्य राजाभाऊ गोरमाळी, बाळासाहेब जाधव, बंकट गोरे यांच्यासह गावातील नागरिक, गरीब, गरजू व निराधार महिला मोठ्या संख्येने उपस्थित होत्या.
गरजूंच्या चेहऱ्यावर हास्य फुलविणारा हा उपक्रम सामाजिक बांधिलकीचे उत्तम उदाहरण ठरत आहे.
No Comment! Be the first one.